طنين. ٢٢.
ياعثرة جذم ماتخلص وياي.
اوگلي اليا وگت بدروبك اتعثر.
افز من نومي انه وجنت حلمان.
وبقى او يالنجم ياصاحبي اتذكر.
چم مره صرتلك ريشه بجناح.
اعلييك انته وانه بالهوى اتكسر.
تهل ضحكك علي لو طايح ابضيج.
وانه الصفنتك ياوسفى اتفطر.
تغيب انته عليه شهور ويام.
وظل بالگوه اضوگ الداد وتمرمر.
وبيع الروح برخص سعر وشريك.
او ماهمني الدمع بعيوني يتعصر.
هم عندك اخو ياصاحبي وياك.
اشما انته تزعله ايگلك اتشكر.
اشوف اليوم خوة ناس تجار.
او على لگمة خبز جم واحد تحجر.
وانه الي صرتلك ليل ونهار.
او گبل لا تشتكي گلبي اشتكى ويثغر.
امد ايدي الك ياصاحبي دوم.
او ماعوفك ولو جفك صبح خنجر.
وشما انته الي تصبحلي چتال.
صدكني احبك اكثر او اكثر.
بس ارد انه اگلك عبره للناس.
ربك مايضيع تعبي المطشر.
الله يحاسبك عالكعده والزاد.
هناك ابلا عمل ماتعبر المحشر.
واذا ماعندك انته اخلاص وياي.
لتصدك ابد عالباري هم تعبر.
او مو انته التصدك بيه مخذول.
انه اتواضع فقط مو ذله تتصور.
او راح اتعب يصاحب وحصد الزين.
او رغم ادري انته شايل دفتر مزور.
القصيدة كتبت بتاريخ ١٩٩٨/٣/٧
الشيخ مجيد العقابي.
٢٠١٥/٦/١٣
ونشرت في ٢٠١٥
واعيد نشرها اليوم
٢٠١٩/٦/١٣
0 التعليقات:
إرسال تعليق